Partidazo do RC Celta nesta novena xornada de LALIGA EA SPORTS ante a UD Las Palmas. Un encontro que prometía ser moi intenso e ao que non lle faltou de nada. Moita intensidade e dous partes totalmente diferenciadas foron claves para a épica vitoria do conxunto celeste en Gran Canaria.
Nos primeiros compases do encontro, ambos os equipos demostraron as ansias coas que saltaran ao terreo de xogo, repartíndose o dominio do balón e tamén os ataques. Foi a partir do cuarto de hora cando os de Claudio Giráldez apropiáronse do estadio Pío-Pío e comezaron a dominar en solitario. No 16, un colosal Óscar Mingueza poñía un centro á área que remataba ao pau Borja Iglesias pero, o rexeite aproveitaríao Williot Swedberg para anotar o primeiro. Un primeiro gol celeste que, finalmente non subía ao marcador por unha posición milimétricamente adiantada do dianteiro santiagués. Primeiro aviso claro dun RC Celta que buscaba a súa primeira vitoria a domicilio e que non ía permitir que lla arrebatasen.
Continuaba o encontro cun recital de Hugo Álvarez demostrando atrevemento e técnica en cada un contra un que se presentaba. Moi boa actuación do mozo canteirán que, recentemente convocado coa selección española Sub-21, volveu tolo a Viti Rozada pola banda.
Rozando a media hora de partido, Borja Iglesias soubo ler entre liñas e debuxar o desmarque para aproveitar un novo centro de Óscar Mingueza e mandalo ao fondo da rede. Perfecta conexión entre ambos os xogadores que tería como resultado un tanto valiosísimo que, esta vez si, subiría ao marcador.
Ao comezo da segunda parte, o partido deu un envorco de 180º. Cunha diferenza de tan só tres minutos, Ilaix Moriba e Iago Aspas eran expulsados tras acumular dobre cartón amarelo polo que o RC Celta quedaba con nove xogadores sobre o terreo de xogo. Unha clara inferioridade numérica coa que o conxunto celeste debía facer fronte aos máis de 30 minutos que lle restaban ao encontro.
A partir dese momento, os de Claudio Giráldez deron unha clase maxistral de como defender o resultado con garras e dentes, ou o que é o mesmo, con afouteza e corazón. Un auténtico equipo que se uniu ante a adversidade e loitou ata o asubío final, e non só defendendo o resultado senón que tamén continuaron xerando ocasións de perigo.
Moita honra e moito orgullo para todos os xogadores celestes que defenderon este escudo ata o último minuto no estadio de Gran Canaria, alzándose coa primeira vitoria da tempada a domicilio e sumando tres puntos valiosísimos que colocan ao RC Celta no Top 10 da Clasificación Histórica de Primeira División.
FICHA TÉCNICA:
0 – UD Las Palmas: Dinko Horkas; Viti Rozada, Álex Suárez (Campaña 75′), Juanma Herzog, Álex Muñoz (Benito Ramírez 58′); Adnan Januzaj, Dário Essugo, Javi Muñoz (Manu Fuster 58′), Alberto Moleiro; Fábio Silva (Marc Cardona 67′) e Ollie McBurnie (Mata 67′).
1 – RC Celta: Vicente Guaita; Manquillo (Javi Rodríguez 61′), Carl Starfelt, Marcos Alonso; Óscar Mingueza, Fran Beltrán, Ilaix Moriba, Hugo Álvarez (Franco Cervi 79′); Iago Aspas, Borja Iglesias (Tasos Douvikas 62′) e Williot Swedberg (Pablo Durán 61′).
Gol: Borja Iglesias (28′).
Árbitro: Cordero Vega (Comité Cántabro). Por parte do RC Celta, amoestou con tarxeta amarela a Fran Beltrán (32′), Javier Manquillo (42′) e a Tasos Douvikas no (75′). Expulsou por dobre amarela a Ilaix Moriba (52′) e a Iago Aspas (56′). Por parte da UD Las Palmas, foron amoestados con amarela Fábio Silva (45+1′) e Campaña (82′).
Incidencias: Partido correspondente á novena xornada de LALIGA EA SPORTS disputado no estadio de Gran Canaria.
