O dianteiro brasileño chega cedido polo Spartak de Moscú ata o final da presente tempada
O Real Club Celta pechou a incorporación do dianteiro brasileiro Welliton, que chega cedido polo Spartak de Moscova ata o final da presente tempada. O xogador paraense, cunha impresionante cifra de goles na esixente liga rusa, convértese no segundo reforzo invernal do Celta, tras a chegada do central Íñigo López a semana pasada.
Welliton Soares de Morais (Conceição do Araguaia, 1986) formouse no Goiás Esporte Clube, conxunto no que destacou desde moi pronto pola súa faceta goleadora, coa que atraeu a atención dun dos equipos máis importantes de Rusia, o Spartak de Moscova.
No verán de 2007 asinou pola entidade moscovita, onde ofreceu un rendemento espectacular e xogou a UEFA Champions League. O atacante brasileiro, máximo goleador do campionato ruso dúas tempadas consecutivas (en 2009 con 21 goles e en 2010 con 19 tantos) participou nun total de 133 partidos nos que asinou a cifra de 81 dianas.
No 2013 Welliton regresou a Brasil, onde defendeu as camisetas do Grêmio e do São Paulo no Campionato Brasileiro, máxima categoría do fútbol brasileiro, onde anotou 6 goles.
O novo dianteiro celeste chegará ao aeroporto de Peinador este sábado en torno ás 15:30 horas.
