A Fundación Celta celebrou este martes a presentación oficial da súa nova Escola Celta Integra en Santiago, en colaboración co Colexio Compañía de María, que acolleu o acto e brindou un apoio fundamental para a súa organización.
A xornada, que reuniu a alumnos do centro, familias, asociacións vinculadas á discapacidade e representantes institucionais, contou coa presenza de Pilar Lueiro, concelleira de Deportes do Concello de Santiago, e de Begoña Abeijón e Luis Miguel Vázquez, directora e subdirector de Apoio á Discapacidade da Xunta de Galicia. O acto foi inaugurado por Alberto Martínez, director de Deportes do Colexio Compañía de María, cuxa implicación foi clave na posta en marcha desta nova sede do programa.
Na súa intervención, Germán Arteta, director da Fundación Celta, destacou que “a Escola Celta Integra nace co obxectivo de utilizar o fútbol como unha ferramenta integradora, como un espazo de crecemento, de compañeirismo e de superación. Desde a Fundación cremos firmemente no poder do deporte non só para formar deportistas, senón tamén para formar persoas”.
Tras a proxección dun vídeo explicativo e a intervención de Eric Pérez, coordinador do programa, os asistentes desprazáronse ao campo de fútbol do centro para presenciar unha exhibición de adestramento a cargo de xogadores do equipo Celta Integra. A xornada concluíu cun sorteo de obsequios do RC Celta e unha foto de familia con todos os participantes.
A Fundación Celta, a través deste proxecto, reafirma o seu propósito de xerar impacto positivo na sociedade mediante o fútbol, fomentando a inclusión, a igualdade de oportunidades e a formación integral da mocidade, especialmente de persoas con discapacidade.
Chamada a inscrición:
A Escola Celta Integra está aberta a novos xogadores con discapacidade que desexen participar nunha contorna deportiva inclusiva e formativo. As persoas interesadas poden contactar a través do correo electrónico [email protected] para máis información e inscricións.
