O RC Celta chegou a un acordo co mediocentro catalán Àlex Carbonell que asina como celeste para as próximas 4 tempadas e estará ás ordes de Onésimo González no debut do equipo na Primeira División RFEF. Convértese así na cuarta incorporación do filial tras Gaizka Campos, Javi Gómez e Carlos Beitia.
Àlex Carbonell (San Cugat do Vallés, 1997), xogou a pasada campaña no FC Luzern, da Primeira División suiza, con quen se proclamo campión de Copa.
Formado nas categorías inferiores do FC Barcelona, conta con experiencia en Segunda División, onde disputou un total de 42 partidos co CF Reus Deportiu e o Córdoba C.F.
