O Celta Fortuna suma a súa sétima vitoria en liga tras gañar 2-1 ao Unionistas de Salamanca. Barreiro foi o escenario dunha impecable actuación do filial celeste, que a pesar da expulsión de Javi Domínguez no tramo final do encontro soubo defender a vantaxe outorgada por Hugo Álvarez e Tincho e reter os tres puntos en casa.
Os de Claudio Giráldez, redimidos da derrota a domicilio fronte ao Sestao, volveron a casa para evidenciar porque ocupan os postos máis altos da clasificación. O conxunto galego mostrouse sólido, rápido e autoritario ante un Barreiro cheo que foi testemuña do dominio celeste. O primeiro en verificar esta superioridade foi Hugo Álvarez cando no minuto 8, tras unha contra liderada por Miguel Román e un milimetrado pase filtrado, marcou o primeiro tanto do partido. As ocasións locais eran abundantes, pero ningunha conseguiu materializarse antes do descanso.
A segunda metade arrincou cun Unionistas inspirado que parecía reaccionar aos ataques celestes. Ata que un tiro cruzado de Tincho subiría ao marcador o 2-0 que volvería someter aos charros. Unha cómoda situación para o Fortuna que se vería alterada ao quedar cun menos sobre o terreo de xogo despois dunha polémica vermella a Javi Domínguez.
Con media hora aínda por diante, Dani Pons, técnico visitante, aproveitou a situación para tentar rascar algún punto. A remontada parecía posible para os salmantinos cando Giménez marcou o 2-1, pero, tras varios intentos errados e intachables paradas de Ruly, o cronómetro alcanzou os 90 minutos.
O próximo encontro dos de Claudio Giráldez será o 19 de novembro ás 12:00h no Estadio de Pinila ante o Club Deportivo Teruel.
FICHA TÉCNICA
2 – Celta Fortuna: Ruly; Javi Rueda, Javi Rodríguez, Javi Domínguez, Joel López, Tincho; Damián, Miguel Román; Alfon, Raúl e Hugo Álvarez.
1 – Unionistas de Salamanca CF: Cacha, Camus, Jon Rojo, Ramiro, Javi Villar, Losada, Nespral, Slavy, Rastrojo, Carlos Giménez e Serrano.
Goles: 1-0, min. 8: Hugo Álvarez. 2-0, min. 57: Tincho. 2-1, min. 78: Giménez.
Árbitro: Fuente Marín. Expulsou con vermella directa a Javi Domínguez (min. 69). Ensinou amarela aos locais Tincho, Raúl e Miguel e aos visitantes Cacharrón, Serrano, Ramiro e Giménez.
Incidencias: Partido correspondente á décimo segunda xornada. Campo Municipal de Barreiro.
