Un dobrete de Alfon fronte á Cultural Deportiva Leonesa (2-0) alza ao Celta Fortuna ao liderato. O filial celeste regresou a Abanca Balaídos para despedir o ano en casa da mellor das maneiras: con vitoria ante un dos colosos da clasificación.
O Fortuna arrincou a cita cunha dinámica que mantería durante os seguintes 90 minutos. Os de Claudio Giráldez saltaron ao terreo de xogo con tal intensidade que 60 segundos foron suficientes para que se producise a primeira ocasión destacada do partido: un remate de Javi Rodríguez que terminaría repelendo Bañuz. O xogo atrevido e compasado do filial impoñíase en Abanca Balaídos ata tal punto que aos leoneses non quedou máis remedio que refuxiarse na súa área, sendo a contra a súa única bala para achegarse a César Fernández. Aquela falta de aire comezou a facerse evidente cando un disparo raso de Alfon, tras roubo e pase de Miguel Román, lograría subir ao marcador o 1-0. Un gol que situou ao equipo celeste en posición de vantaxe e detivo calquera avance da Cultural ata a chegada do descanso.
Á volta de vestiarios, o conxunto de Raúl Llona saíu con uñas e dentes a defender a súa posición como líder da Primeira Federación, facendo que os de Giráldez vísense presionados, obrigados a replegar liñas e a ceder a posesión. Con todo, o Fortuna rexurdiu grazas a unha nova intervención de Alfon que transformou aquela determinación dos visitantes nun mero espellismo. Unha manobra perfecta que comezaría nos pés de Miguel Román, ao poñer un pase ás costas da zaga rival, e que terminaría no fondo da rede grazas a un disparo do 11 celeste imparable para Bañuz.
Co 2-0 no electrónico, ao filial só quedáballe resistir. E así o fixo ata o asubío final, cunha gran dose de “Afouteza e Corazón” na súa volta a Abanca Balaídos. Sen dúbida, o broche de ouro do 2023 para a Celta Fortuna en casa.
FICHA TÉCNICA
2 – Celta Fortuna: César Fernández; Hugo Álvarez, Yoel Lago (min. 94, Pablo Meixus), Manu Fernández, Javi Rodríguez (min. 67, Joel López), Tincho Conde; Damián Rodríguez, Miguel Román; Raúl Blanco (min. 79, Cantero), Pablo Durán (min. 67, Bruno Iglesias) e Alfon (min. 79, Dani González).
0 – Cultural Deportiva Leonesa: Miguel Bañuz; Víctor García, Quique Fornos, Rodri Suárez, Jaume Pol; Kevin Presa (min. 63, Dorian), Bicho (min. 72, Muguruza), Martín Solar, Aarón Rey (min. 63, Barri); Samanés (min. 82, Álvaro) e Escudero (min. 46, Guillermo).
Árbitro: José Alberto Pardeiro Puente. O colexiado sacou cartón amarelo ao xogador da Cultural Kevin Presa.
Incidencias: Partido correspondente á xornada 16 da Primeira Federación disputado en Abanca Balaídos.
