O RC Celta organiza, en colaboración coa ONG Accem, un encontro cultural no que participarán persoas migrantes recentemente chegadas a Galicia e o equipo de división de honra xuvenil do RC Celta. O encontro enmárcase dentro das tarefas solidarias que o club ten programadas para as festas do Nadal, nas cales se compromete a impulsar o desenvolvemento comunitario da cidade a través dos valores do deporte. Durante o devandito evento, ambos os grupos coñecerán distintas realidades vitais e compartirán experiencias que axudarán a establecer vínculos persoais para poñer en perspectiva os logros conseguidos por cada un dos participantes.
A cita terá lugar nas instalacións da Madroa e organizarase de maneira similar a un adestramento de primeiro nivel. Ambos os grupos comparten a mesma paixón polo fútbol, un deporte global que equipara a persoas de distinta procedencia, idioma, e condición social, ao redor dun balón; un xogo no que o compañeirismo e o respecto son fundamentais, un deporte de afouteza e corazón.
