O Celta B non ten teito. Os celestes venceron ao Palencia en Barreiro con dous goles dun Borja Iglesias en estado de graza que xa acumula 16 dianas nesta tempada. O filial céltico é provisionalmente segundo na clasificación, a só 1 punto do primeiro posto.
Forzas igualadas no primeiro tempo. O Celta protagonizou as ocasións máis claras e levou maior perigo á área que o seu rival, un Palencia forte que resistía con solvencia e saía á contra con velocidade. Iglesias tivo nas súas botas a mellor oportunidade para os celestes, a pase de Kevin, pero non estivo acertado no remate.
Os de Menéndez arrincaron a segunda parte con forzas renovadas. Fixéronse co control do partido e iniciaron un asedio á portaría palentina que facía presaxiar a chegada do gol vigués. Tal era a aposta ofensiva do Celta que os visitantes a punto estiveron de soprender á contra. Roger salvou baixo paus.
Os canteiráns seguiron apertando, con máis determinación que frescura no xogo, pero aínda así creando perigo. Mediado o segundo tempo Gus asinou un remate na frontal da área que golpeou no traveseiro tras tocar a manopla do gardameta. O premio á entrega céltica chegaría a catro minutos do final. Borja Iglesias, máximo goleador do equipo, recolleu un balón solto na área e golpeouno con rabia até o fondo da rede.
O Palencia saíu con todo en busca do empate e o Celta aproveitou para matar o partido á contra, finalizada con acerto polo “pichichi” Borja Iglesias. O Celta sitúase provisionalmente como segundo na táboa, a tan só 1 punto do primeiro.
FICHA TÉCNICA
2-CELTA B: Néstor, Kevin, Roger, Alende, Caste, Borja Fdez, Mera (Agus, min.86), Gus, Brais Méndez (Joao, min.53), Hicham (Adrián, min.70), Borja Iglesias.
0-PALENCIA: Alejandro, Asier, Héctor (Navas, min.43), Carrasco, Acoidan, Pelayo, Chuchi, Ibon (Angelo, min.85), Xavi Moré, Diego Torres (Zapata, min.75), Rodri.
Goles: Borja Iglesias, min.83, 1-0; Borja Iglesias, min.90, 2-0.
Árbitro: Muñoz Piedra, do comité madrileño. Amonestou a Gus, Borja Fdez. (Celta); Chuchi, Rodri, Acoidan (Palencia).
Campo: Barreiro.
