O Celta Fortuna estreou o 2026 da mellor maneira posible cunha valiosa victoria a domicilio ante o Cacereño (2-3), nun partido esixente e moi disputado. Un gol de Álvaro Marín, outro en propia porta e un tanto decisivo de Óscar Marcos no tempo de desconto permitiron ao filial celeste sumar tres puntos de moito mérito no seu primeiro compromiso do ano.
Desde o inicio, o Celta Fortuna deixou claro que viaxara coa intención de gañar. Esa ambición traducíuse pronto no marcador, cando no minuto 8 Álvaro Marín abriu o partido tras unha gran xogada colectiva. Óscar Marcos temporizou con intelixencia, filtrou o balón para Joel López e este asistiu á perfección para que Álvaro só tivese que empurrala á rede. O Cacereño reaccionou e buscou o empate, chegando a reclamar un penalti que o VAR finalmente non concedeu. Pouco despois, Coke Carrillo sostivo ao equipo cunha gran parada. O filial celeste seguiu buscando o segundo e atopouno no minuto 38, tras un centro de Andrés Antañón que rematou en gol en propia porta. Con todo, a vantaxe reduciuse rapidamente, xa que o conxunto local marcou na seguinte xogada e deixou o 1-2 antes do descanso.
Tras o paso polos vestiarios, o Cacereño saíu con decisión e logrou o empate no minuto 51, aproveitando o bo momento anímico. O partido volveuse moi aberto, con ocasións para ambos equipos. Joel López estivo preto de marcar cun potente disparo que obrigou ao porteiro local a lucirse. Co paso dos minutos, o encontro gañou en tensión e o Cacereño quedou cun xogador menos no redor do minuto 72, tras ver a segunda tarxeta amarela. Aínda así, os locais non baixaron os brazos e mantiveron a intensidade. Cando todo apuntaba ao empate, apareceu Óscar Marcos no minuto 93 para asinar o triunfo. O atacante celeste impúxose entre dous defensores dentro da área e definiu con calidade para marcar o 2-3 e certificar a vitoria visitante.
Os pupilos de Fredi Álvarez comezan así o ano con tres puntos de prestixio, demostrando carácter e ambición nun escenario complicado. Tres puntos que reforzan ao equipo na parte alta da clasificación e que reafirman o bo momento do conxunto celeste. Agora, o filial xa pensa no seu seguinte compromiso, que será o primeiro partido do 2026 en casa, o próximo domingo 11 de xaneiro ante o Barakaldo CF, co obxectivo de prolongar esta dinámica positiva arroupados polo celtismo.
