O filial celeste respira cun triunfo vital no Espiñedo | CD Arenteiro 1-2 Celta Fortuna

O Celta Fortuna dá un paso adiante e afástase da mala xeira na que se atopaba inmerso o equipo nos últimos encontros. E é que xa son dúas as vitorias que encadea o filial celeste, e ambas as a domicilio, ante rivais moi competitivos que se atopan en plena loita por entrar en postos de promoción. Sen dúbida, unha boa dinámica para afrontar con plena confianza o tramo final da tempada.

Ás 19:00h. arrincaba no Espiñedo o derbi galego que enfrontaba ao conxunto de Fredi Álvarez co CD Arenteiro. Un partido de altos voos que mantivo a tensión e a intensidade desde o minuto un. O técnico celeste apostou por unha formulación plenamente ofensiva pero que, nos primeiros compases, non terminaba de xerar o perigo desexado, dando certa vantaxe ao conxunto local que ía tomando a dianteira e dominando o balón. Co paso dos minutos, o Celta Fortuna foi ordenando as súas ideas e, nunha das súas primeiras oportunidades na área rival, asestou o primeiro golpe. Jordi Escobar aproveitaba un pase preciso de Tincho para rematar na portería de Diego García e adiantar aos celestes no minuto 22. Un tanto que sementou dúbidas entre o Arenteiro mentres que deu ás ao Celta Fortuna que tivo varias ocasións claras, como un disparo de Miguel Román que rozaría o pau e co que mesmo poderían aumentar a súa vantaxe antes do descanso.

A segunda metade comezou tal e como quedara a primeira 15 minutos antes, o filial celeste dominaba e acurralaba á zaga local na súa área. Tal foi así, que tan só dous minutos despois do seu inicio, Hugo Gonzalez poñía o 0-2 no marcador. A partir dese momento e xa con maior tranquilidade, o Celta Fortuna trataba de xestionar con certa intelixencia unha vantaxe moi traballada, contrarrestando o xogo directo do Arenteiro. Un esforzo que parecía cambalearse cando, no minuto 69, Martín Solar acurtaba distancias anotando o tanto local.

Co 1-2 no marcador, o partido converteuse nunha auténtica pota a presión e ambos os conxuntos aumentaron a súa intensidade ata tal punto que o gardameta local terminaría sendo expulsado nos minutos finais. Unha auténtico tira e afrouxa entre dous equipos que querían a vitoria e que pelexaron ata o último suspiro. Tras 7 minutos de tempo engadido, o árbitro pitaba o final dun encontro no que o Celta Fortuna lograba selar unha importante vitoria para sumar tres puntos máis na clasificación cos que seguir afastándose dos postos de abaixo.

Agora, os celestes teñen a vista posta no seu próximo compromiso ante o Barcelona Athlètic que visitará Abanca Balaídos o vindeiro venres, 4 de abril, ás 20:30h.