A Fundación Celta de Vigo continúa traballando intensamente no desenvolvemento de accións e procesos formativos destinados a reforzar o proceso de crecemento dos novos futbolistas. Neste sentido, durante esta tempada púxose en marcha un interesante programa de intercambio de experiencias entre as diferentes categorías co obxectivo de que os xogadores máis veteranos de categorías inferiores poidan trasladar os seus coñecementos aos pequenos.
Nesta ocasión foron os xogadores do Celta B David Goldar, Kevin, Samu e Diego Alende, quen compartiron un adestramento con varios equipos da canteira celeste. Durante a sesión realizaron exercicios e aproveitaron para dar consellos aos futuros futbolistas e responder as súas dúbidas.
Esta enriquecedora acción, na que se implicaron todos os preparadores das categorías inferiores, supón un paso máis na integración e mellora da canteira, sempre en constante crecemento co obxectivo de continuar sendo un referente e un orgullo para a afección.
