Pleno de triunfos ligueiros da canteira nunha fin de semana que comezou o sábado pola mañá cos triunfos dos equipos benxamíns (a domicilio fronte o Colexio Hogar SR e Racing Castrelos FC, respectivamente), Alevín B (en casa do Racing Castrelos FC D) e un Infantil B que conseguía a vitoria en A Madroa fronte o Colegio Apóstol. Pola súa banda, o Xuvenil B derrotou por 4-1 en casa ao Alondras CF e comparte liderado do Grupo I de Liga Nacional co Coruxo FC, empatados a 22 puntos.
Pola tarde chegou a quenda dos equipos cadetes, que se impuxeron en A Madroa á SD Compostela (3-0) e Ourense CF (3-2), respectivamente. O Cadete A é líder do grupo B de División de Honra con 21 puntos, mentres que o Cadete B colidera xunto co CD Choco (18 puntos) o subgrupo 2 B de Liga Galega. Tamén comparte liderado o Infantil A, igualado a 24 puntos co Pabellón Ourense CF, que venceu en casa do CD La Purísima.
O Alevín A pechou o calendario semanal de fútbol 8 co seu triunfo (0-7) fronte o CP Alertanavia na visita a Pahiño. Unha xornada dominical na que o Celta B brillou e venceu por 3-0 ao Real Valladolid Promesas en Barreiro para colocarse en oitava posición do Grupo I de Primeira RFEF Footters con 18 puntos, mentres que o Xuvenil A derrotou por 1-4 ao Real Oviedo para referendar o seu liderado do Grupo I de División de Honra con 31 puntos. Por último, o Celta C – Gran Peña pechou a fin de semana ligueira cun triunfo por 1-3 fronte o CX Sanxenxo e asalta a terceira posición de subgrupo 2A con trece puntos.
Pola súa banda, o Fundación Celta Integra viaxou a Tarragona para pechar a tempada 2019/2020 de LaLiga Genuine Santander.
