La Morocha volveu soar no vestiario do Celta Fortuna tras impoñerse ao Unionistas de Salamanca no Reina Sofía e sumar a súa cuarta vitoria consecutiva da tempada. Un triunfo que reforza o gran estado de forma do filial celeste que soubo sufrir, resistir e golpear no momento xusto, a pesar de xogar máis dunha hora cun home menos.
O partido non arrincou do todo ben para os de Fredi Álvarez. Durante o primeiro tempo, o conxunto rival impuxo o seu ritmo e dificultou o xogo dun Fortuna que non se sentía cómodo sobre o céspede. Aínda por riba, unha rigorosa expulsión de Iago Barreiros no minuto 35 obrigou ao equipo para afrontar o segundo tempo en inferioridade. Lonxe de virse abaixo, o grupo respondeu como mellor saben, con auténtica afouteza.
Tras o descanso, o filial celeste reordenouse, gañou solidez e atopou espazos para facer dano. E pouco tardaría Hugo González en logralo e asestar o seu primeiro golpe penetrándose na área, tras unha contra letal, para poñer o 0-1 no marcador. Un tanto que foi a gasolina perfecta para un equipo que quería máis e que seguía presionando ao conxunto charro en busca de aumentar a súa vantaxe que se quentaba por momentos. Xa no tramo final, novamente o xogador valenciano provocaba un penalti que el mesmo converteu para pechar o encontro cun dobrete en terras salmantinas.
Victoria de moitísimo valor nun campo sempre complicado para o Celta Fortuna que desta maneira suma o seu cuarto triunfo consecutivo no que vai de tempada e aséntase na segunda posición da táboa clasificatoria. Un estado de gloria co que a próxima semana afrontarán un novo derbi, esta vez ante o Ourense CF, no Estadio de Barreiro, o sábado 11 de outubro ás 16:00h.
FICHA TÉCNICA:
0 – Unionistas de Salamanca: Unai, Olmedo, Gorjón, Farru, Juanje, Jota (Pere Marco, min. 72), De la Nava (Pachón, min. 83), Prada, Jan (Roldán, min. 72), Juanma (Álvaro, min. 69) e Abde (Hugo Bustos, min. 72).
2 – Celta Fortuna: Coke; Anxo (Jaime Vázquez, min. 94), Pablo Meixús, Joel López; Pablo Gavián, Hugo Burcio, Andrés Antañón (Capdevila, min. 72), Luis Bilbao (Óscar Marcos, min. 46); Hugo González (Ndiaye, min. 86), Iago Barreiros e Álvaro Marín (Ángel Arcos, min. 46).
Goles: 0-1, min. 47: Hugo González. 0-2 min. 82: Hugo González de penalti.
Árbitro: Francisco González. Mostrou tarxeta vermella ao xogador do Celta Fortuna, Iago Barreiros. Por outra banda, viron cartón amarelo Luis Bilbao, Anxo e Hugo Burcio.
Incidencias: Partido correspondente á sexta xornada de Primera Federación disputada no estadio Reina Sofía de Salamanca ante 2.797 espectadores.
