O Celta Fortuna non puido prolongar a súa boa xeira e caeu por 2-0 na súa visita ao Anxo Carro fronte ao CD Lugo. Os locais golpearon en cada metade e, malia quedar cun xogador menos na segunda parte, conseguiron manter a raia a un equipo celeste que o intentou ata o final pero non atopou o camiño do gol.
O inicio foi complicado para os de Fredi Álvarez. O Lugo impuxo un ritmo alto e dominou os primeiros compases, obrigando aos celestes a replegarse. Un balón profundo ás costas da defensa rematou no 1-0, obra de Txus Alba, que aproveitou o bote para superar por alto a Coke Carrillo. A pesar do golpe, o Celta Fortuna respondeu con carácter e tivo opcións a balón parado, pero sen acerto na definición.
Na segunda metade, o guión semellou abrirse cando o Lugo quedou cun menos tras a expulsión de Gayà. O Fortuna adiantou liñas, Nathaniel e Arcos buscaron xerar perigo polas bandas e o equipo empurrou en campo rival. Porén, na primeira chegada local tras os cambios, Unzieta asinou o segundo tanto cun disparo preciso que pechou o marcador. Con todo, e malia o esforzo celeste, o Lugo mostrouse sólido en defensa e soubo protexer a súa vantaxe.
A derrota fai que o Celta Fortuna ceda posicións na táboa, pero o equipo mantén intacta a súa ambición e capacidade de reacción. A próxima cita será na casa fronte ao Racing, un novo derbi clave para recuperar sensacións e volver sumar de tres.
FICHA TÉCNICA:
CD Lugo: Iker Piedra; Iago López (Pablo Trigueros, min 72), Josep Gayá, Amo (Nathaniel Nicholas, min 46), Diego Caballo; Txus Alba (Álex Balboa, min 72), Kevin Presa, Neco Celorio (Samanes, min 65), Pastrana; Lago Júnior (Garriz, min 67) e Unzueta.
Celta Fortuna: Coke Carrillo; Anxo (David de la Iglesia, min 65), Pablo Gavián, Meixús, Joel López; Andrés Antañón (Álvaro Marín, min 82), Capdevila (Carro, min 65), Luis Bilbao (Hugo González, min 55), Óscar Marcos; Germán Milla (Somuah, min 55) e Arcos.
Goles: 1-0, min.30, Txus Alba; 2-0, min.67, Unzueta.
Árbitro: Gonzalo González (Colexio madrileño). Expulsou ao futbolista do Lugo, Gayá, no minuto 60 por dobre cartón amarelo. Amonestou ao técnico Yago Iglesias e aos xogadores do Lugo Diego Caballo, Iago López, Samanes e Kevin Presa, e aos do Celta Fortuna Gavián, Anxo e Meixús.
Incidencias: Derbi galego do grupo 1 de Primeira Federación disputado no estadio Anxo Carro ante 2.430 espectadores. Fixo o saque de honra unha paciente da Asociación Galega contra o Cancro.
