Nun emotivo inicio de ano, o RC Celta únese en memoria daqueles celtistas que xa non están entre nós. O primeiro partido do ano 2024 en Abanca Balaídos, que enfrontará ao RC Celta e Real Betis Balompié, tinguirase de nostalxia e respecto grazas a unha iniciativa especial que pretende render homenaxe aos celtistas que nos deixaron este recentemente terminado 2023.
O club preparou un emotivo mural conmemorativo no interior do Estadio, lugar que se converterá a partir de agora nun punto de encontro para o recordo a través dunha ofrenda floral. Ademais, desde as 16:45 h ata as 17:15 h, a porta 14 de Marcador abrirase para permitir o acceso á devandita bancada a calquera afeccionado que queira contribuír deixando flores ou calquera recordo que desexe compartir. Este bonito xesto en memoria dos nosos celtistas culminará cun minuto de silencio antes do inicio do partido.
Un respectuoso instante que quere lembrar a aqueles celtistas que sempre estarán presentes na nosa memoria e que se realizará a partir deste intre no primeiro partido de cada ano. Equipo e afección loitarán unidos, unha vez máis, por alcanzar unha vitoria que, nunha xornada tan especial sería a mellor homenaxe posible.
