Goleada na primeira vitoria en casa do curso | Celta Fortuna 3-1 SD Amorebieta

O Celta Fortuna conseguiu a súa primeira vitoria da tempada en casa ante a SD Amorebieta (3-1). Fer López, Tincho e Jordi Escobar selaron unha merecida goleada fronte a un cadro vasco que non logrou dixerir o atracón local.

O encontro presentábase complicado para o Fortuna, que chegaba minguado pola falta dos internacionais e a ausencia no banco dos sancionados Fredi Álvarez e Gael Potti. A pesar da situación, o filial celeste saltou ao céspede coa vista posta nos tres puntos e, despois de varios intentos, chegou a recompensa. Fer López combinou con Iago Barreiros para quedar so fronte ao porteiro rival e resolver cun disparo cruzado ao pau longo que abriu o marcador (1-0). O dominio continuou durante os seguintes minutos, pero na recta final do primeiro tempo, un desafortunado despexe na área de Marc Vidal provocou o empate dos visitantes (1-1).

Lonxe de verse afectados polo revés, os celestes saíron con máis forza, e nin cinco minutos da segundo metade fixeron falta para que Tincho devolvese a vantaxe ao Fortuna cun disparo cruzado (2-1). Tres puntos que terminaría asinando Jordi Escobar nos últimos compases do encontro cun golazo. O 9 recuperou o balón no medio do campo e lanzou un potente disparo desde fóra da área que se coou pola escuadra (3-1).

Con este triunfo, o Celta Fortuna toma impulso e pon a mira no seu próximo compromiso, que será o sábado 19 de outubro fronte ao CD Lugo no Anxo Carro.