Iago Aspas gaña o primeiro Premio Estrella Galicia da tempada. O canteirán foi elixido polos afeccionados celestes como o mellor futbolista do conxunto vigués do mes de setembro. Este recoñecemento chega nun mes especialmente significativo para o noso capitán, quen alcanzou a impresionante cifra de 500 partidos oficiais co primeiro equipo do RC Celta.
Actualmente, Aspas disputou un total de 502 encontros, nos que marcou 208 goles e repartido 81 asistencias, sumando 36.568 minutos coa camiseta celeste. Unhas cifras consolídano como unha verdadeira lenda viva do club e un galardón máis que afianza o seu legado na historia do Celta.
Iago, que se impuxo na fase final da votación a Carl Starfelt, Marcos Alonso, Hugo Álvarez e Óscar Mingueza, expresou a súa gratitude á afección e aos seus compañeiros polo premio nunha entrevista para Celta Media. “Estou moi contento. Grazas á afección por votarme e tamén aos meus compañeiros por axudarme a conseguir este premio. É algo moi bo e moi bonito, e iso quere dicir que se están facendo as cousas ben”, subliñou o 10.
Tras engadir as súas impresións sobre o galardón, Aspas falou do inicio de tempada, destacando que “tivemos partidos moi bos, estamos a facer as cousas moi ben”, antes de analizar o próximo encontro. “Agora estamos nunha semana moi emocionante cun partido moi bonito en Abanca Balaídos, onde temos que sacar os tres puntos. É un rival difícil, pero estamos na nosa casa, coa nosa xente. Xa xogamos contra outros grandes rivais poñéndoos en aprietos e espero, xa non só puntuar, senón gañar este partido”.
Ademais, este mes de outubro arrinca a Copa del Rey e o capitán non quixo perder a oportunidade de destacar a ilusión que lle fai dita competición. “Creo que é un torneo moi bonito, no que queremos volver ter partidos na nosa casa e, para iso, necesitamos estar concentrados e ir pasando roldas.”, sinalou.
Finalmente, pechou as súas declaracións, de novo, agradecido coa afección. “Moitas grazas, afección, por este premio. Traballaremos para conseguir moitos máis”.
Parabén, Iago!
