Tras o éxito da iniciativa de tinguir as aulas, con centos de nenos e nenas de diferentes colexios vestidos de celeste durante as clases do día de hoxe, o RC Celta quere máis. O club busca que a ilusión se note en cada recuncho da cidade, por iso engalanou os sitios máis emblemáticos de Vigo, con bufandas celestes e carteis, e fai un novo chamamento ao celtismo. É o momento de sacar as bandeiras aos balcóns e terrazas, de encher as rúas, os barrios e todas xanelas coas nosas cores. De aquí ao domingo, día decisivo para o equipo, o Celta quere que Vigo respire celtismo en cada recuncho para alentar aos xogadores neste tramo final tan ilusionante.
