O Celta Fortuna volveu desafiar a lóxica en Lezama cunha vitoria de enorme mérito ante o Bilbao Athletic. Os celestes levantaron un partido que se lles puxo costa arriba moi cedo, obrigados a competir durante máis dunha hora cun xogador menos, e fixérono cunha madurez impropia dun filial. Non é un feito illado: é a terceira vez esta tempada que o conxunto de Fredi Álvarez logra remontar en inferioridade numérica, confirmando unha identidade competitiva e un carácter marca Celta.
Tras un inicio prometedor, a expulsión de Ndiaye deixou ao Fortuna ante un escenario hostil que o filial branquivermello soubo aproveitar para adiantarse. Pero lonxe de virse abaixo, os celestes souberon resistir, axustar liñas e manterse con vida. Xa na continuación, o equipo deu un paso á fronte, gañou presenza con balón e atopou o premio do empate cun gol en propia de Jon de Luis, antes de culminar a xesta cun auténtico golazo de Andrés Antañón que silenciaba Lezama. A partir de aí, tocou sufrir. E o Fortuna fíxoo con orde e seguridade, sen renunciar mesmo a ameazar á contra.
Cuarta vitoria nos últimos seis partidos e terceiro triunfo consecutivo no feudo biscaíño nas súas últimas visitas, o Celta Fortuna mantén a súa afouteza e demostra un carácter que sabe loitar contra a adversidade. O último partido deste 2025 para os de Fredi Álvarez será en casa, en Abanca Balaídos, este sábado 20 de decembro ás 16:15h., ante o Real Madrid Castela.
FICHA TÉCNICA:
1 – Bilbao Athletic: Santos, Aldai (Adrián Perez, Min. 82), Ebro (Irurita, Min. 58), Jon de Luís, Barandalla, Lete (Guibe, Min. 58), Eder García, Conde (Huestamendia, Min. 46), Ibon Sánchez (Beñat Garcia, Min. 21), Bujan (Hierro, Min. 64), Ibai Sanz.
2 – Ceta Fortuna: Coke Carrillo, Anxo Rodríguez, Pablo Meixús, Seyni Ndiaye, Anthony Khayat, De la Iglesia (Andrés Antañón, Min. 46), Hugo Burcio, Joel López (Milla, Min. 88), Hugo González (Capde, Min. 81), Álvaro Marín (Bernard Somuah, Min. 46), Ángel Arcos, Min. 74), Oscar Marcos (Jaime Vazquez, Min. 65)
Goles: 1-0 (Min. 27) Ebro. 1-1 (Min. 54) Jon de Luís en propia porta. 1-2 (Min. 63) Andrés Antañón
