O Celta Fortuna clasifícase para a final do playoff de ascenso a Segunda División. O filial celeste asinou unha tarde histórica en Abanca Balaídos ao superar ao CE Europa por 3-2. Dous goles desde o punto de penalti de Hugo González e outro de Ángel Arcos na prórroga acabaron decidindo un duelo que permitiu aos de Fredi Álvarez selar o pase á primeira final de ascenso á categoría de prata da súa historia.
A primeira metade foi moi igualada e esixente para ambos os equipos. O Europa amosou personalidade desde o inicio e logrou adiantarse no marcador pasada a media hora grazas a Jordi Cano. O Fortuna buscou a reacción con varias chegadas perigosas, especialmente pola banda dereita, pero atopouse cun rival ben plantado e con poucas concesións. Co 0-1 chegouse ao descanso, deixando a eliminatoria completamente aberta.
Tras o paso polos vestiarios, o conxunto celeste deu un paso á fronte e atopou premio desde o punto de penalti. Hugo González transformou dous lanzamentos para darlle a volta ao marcador e achegar ao Fortuna á clasificación. Porén, o Europa non baixou os brazos e volveu empatar tamén desde os once metros por medio de Jordi Cano.
Co 2-2 rematou o tempo regulamentario e a eliminatoria marchou á prórroga. E aínda que o empate servía, apareceu Ángel Arcos para desatar a tolemia entre os máis de 7.000 afeccionados presentes cun gran disparo desde fóra da área que acabou converténdose no billete cara á final.
O soño continúa así para un Celta Fortuna que segue facendo historia e que xa ten por diante o último reto da tempada. A final polo ascenso a Segunda División enfrontará aos celestes coa Ponferradina nunha eliminatoria a dobre partido que se decidirá no templo celeste e na que o club espera contar co apoio de todo o celtismo.
