O Celta e Javi Galán volven unir os seus camiños. O lateral estremeño firma ata 2028 e regresa á que foi a súa casa converténdose no segundo reforzo do conxunto celeste neste mercado de verán.
A súa volta supón o reencontro cun club no que deixou unha gran pegada, tanto polo seu rendemento sobre o terreo de xogo como polo compromiso e a implicación que sempre mostrou defendendo a camiseta celeste. Durante a súa primeira etapa en Vigo disputou un total de 79 partidos oficiais nos que se consolidou como unha das grandes referencias da banda esquerda.
Tras pechar o seu primeiro ciclo no Celta, Javi puxo rumbo ao Atlético de Madrid na tempada 2023/24. Desde entón, seguiu acumulando experiencia en diferentes competicións como a UEFA Champions League, a Supercopa de España ou o Mundial de Clubs da FIFA. Tras pasar tamén polas filas da Real Sociedad e Osasuna, o defensa regresa ao Celta para afrontar un novo e ilusionante reto nun club que coñece perfectamente.
Javi Galán destaca pola súa capacidade para percorrer toda a banda, a súa profundidade en ataque e a súa habilidade para superar rivais en situacións dun contra un. A súa precisión nos centros e a súa facilidade para aproveitar os espazos convérteno nun futbolista que pode encaixar á perfección no esquema de Claudio Giráldez.
Neste novo capítulo como celeste volverá compartir vestiario con xogadores cos que xa coincidiu na súa anterior etapa como Iago Aspas, Sergio Carreira, Williot Swedberg, Carlos Domínguez, Hugo Sotelo, Iván Villar, Hugo Álvarez ou Pablo Durán, o que facilitará a súa integración nun grupo que afronta con máxima ilusión a nova tempada.
Bienvenido de novo a casa, Javi!
