Haberá un número limitado de prendas con tallas que van desde a 14 ata a XXL.
A camiseta especial que adidas e o Real Club Celta lanzan con motivo da continuación da relación entre ambas as entidades estará desde mañá á venda nas tendas oficiais do club. A camiseta, unha das de maior calidade da prestixiosa firma alemá, pode adquirirse por 65 euros e as tallas dispoñibles van desde a 14 até a XXL.
O equipo vigués estreará esta camiseta no partido de volta dos oitavos de final da Copa do Rei que disputará no Estadio Santiago Bernabeu o día 9 do presente mes. A camiseta de adidas mantén a tipoloxía das letras, de inspiración galega, así como o triskel, e introduce os chevrones na parte dianteira, algo que a partir destes momentos levarán, por petición de Citroen, todos os equipamentos oficiais do Club.
Esta camiseta especial inclúe poliéster entrelazado deportivo, axuste Formotion -tecnoloxía rexistrada por adidas que fai que a camiseta se adapte ao corpo para proporcionar maior liberdade de movemento e comodidade durante o exercicio- e a tecnoloxía de ventilación ClimaCool, que mantén ao deportista fresco e seco en pleno esforzo.
As tendas do club, tanto no estadio de Balaídos como no Corte Inglés, terán desde mañá a disposición dos afeccionados un número limitado de camisetas, nas que, como no resto de produtos oficiais, os abonados gozarán dun desconto do 10 por cento. O horario de apertura das tendas celestes en Balaídos é de luns a sábado de 10.00 a 14.00 e de 17.00 a 20.00 horas.
*Na foto Iván Villar, porteiro do Celta Xuvenil B
