As obras da Cidade deportiva RC Celta arrincaron hoxe co simbólico acto da colocación da primeira pedra. O evento congregou a preto de mil persoas entre as que se atopaban o presidente do RC Celta, Carlos Mouriño; o vicepresidente da Xunta de Galicia, Alfonso Rueda; o conselleiro de Medio Rural, José González Vázquez; a alcaldesa de Mos, Nidia Arévalo; o secretario xeral para ou Deporte, José Ramón Lete, así como toda a directiva do club e xogadores do primeiro equipo e categorías inferiores. O inicio das obras permitirá que o primeiro equipo adéstre nas novas instalacións en xullo de 2020 nun proxecto que situará ao Celta como un referente internacional ademais de consolidar un obxectivo primordial para o club: apostar pola formación e investir nunha canteira de xogadores de primeiro nivel que nutra ao primeiro equipo.
O presidente do RC Celta, Carlos Mouriño, iniciou a súa intervención sinalando que “este é un acto de gran transcendencia. Hai dous anos fixemos un pacto para a construción desta cidade deportiva. Puxemos os reloxos en marcha. E hoxe estamos aquí os que cumprimos o pacto para facer un Celta cada vez máis grande”, recalcou. “Non están os que cuxas palabras non ten validez -proseguiu-, os que din estar co Celta pero a verdade é que non queren deixarlle crecer. Co acto de hoxe o que facemos máis que unha primeira pedra é plantar para que floreza, un soño”.
Primeiro equipo e canteira
Mouriño, arroupado pola súa xunta directiva, subliñou que se trata de “unhas instalacións que imaxinaramos miles de veces e que serán o futuro do club que hoxe é, precisamente, máis esperanzador con este acto. Moi poucos clubs poden afirmar que once dos seus xogadores proceden da canteira. Falar de primeiro equipo e canteira é o mesmo”.
Carlos Mouriño dixo sentirse emocionado porque o proxecto pasase de ser un soño a converterse en realidade e recalcou que esa emoción está reflectida no obxecto que el mesmo se encargou de meter na urna da primeira pedra: unha placa de son co himno do Celta que a afección canta sempre antes de cada partido. Agradeceu aos veciños de Mos que soubesen ver unha gran oportunidade neste proxecto e dirixiuse a todos eles ao sinalar que “alguén quere pór unha bota sobre o voso territorio e como David fixo con Goliat, dígovos que se lle pode vencer”.
Pola súa banda, o secretario xeral para o Deporte da Xunta de Galicia, José Ramón Lete, cualificou de fito o acto de primeira pedra da cidade deportiva, proxecto que é, dixo “froito da unión, algo que está no ADN do Celta”.
A alcaldesa de Mos, Nidia Arévalo, afirmou que se trata dunha infraestrutura “importante para Mos, para Vigo e para toda a área metropolitana! e sinalou que o seu equipo está “na vía de colaboración con Vigo. Somos un concello aberto e eu vou seguir entregada con este proxecto”.
Durante o acto tamén interveu o capitán do equipo, Hugo Mallo e o xogador do equipo Benjamín celeste Germán Alonso, veciño de Mos, que se encargaron de introducir na urna da primeira pedra unha camiseta do Celta. O acto contou coa música tradicional do premiado grupo de Mos, Lagharteiras.
Referente do noroeste peninsular
A cidade deportiva RC Celta situará a Galicia como referente internacional ao ser a primeira de España que contará con amplos espazos para o lecer. O proxecto albergará, ademais do nove campos para categorías profesional e inferiores e un estadio para o filial con capacidade para polo menos 4.000 espectadores, espazos para outros deportes, lecer deportivo e non deportivo, actividades na natureza, concertos e festivais musicais, a Universidade do Deporte, en colaboración coa próxima Universidade de Vigo; así como a creación dun ecosistema vinculado ás starts ups tecnolóxicas na contorna deportiva.
Polo momento, as obras que se levaron a cabo nos últimos meses centráronse en preparar o terreo. O proxecto, asinado polos galegos Jesús Irisarri e Guadalupe Piñera, presentes tamén no acto; está inspirado de maneira total na propia orografía da zona para respectar o ámbito no que se atopa, con vistas á Ría de Vigo. De feito, o proxecto ten vocación de converterse nun referente de sustentabilidade, xestión de servizos da auga, a terra e a enerxía.
En total, deporte, lecer, parque forestal e comercio ocuparán unha gran área na que a cidade deportiva ocupará 237.000 metros cadrados distribuídos nos nove campos (5 de herba natural e catro, de artificial), a Area-multiusos, edificios de vestiarios, residencia para categorías inferiores, zonas de ximnasio e spa, a Universidade do Deporte e áreas de tecnificación, restauración e lecer. O proxecto contará con case 300.000 metros cadrados de parque verde forestal de uso público onde só haberá especies autóctonas galegas. O resto da superficie empregarase para mellorar a conexión interna das novas instalacións e da zona, en xeral. Ademais, as novas instalacións lograrán crear 2.000 novos postos de traballo.
