O club vigués, un dos pioneiros en España na implantación dun protocolo propio de actuación ante situacións de acoso e violencia, súmase a esta iniciativa para reforzar a prevención e a resposta coordinada nos estadios
O Celta continúa avanzando no seu compromiso coa protección, a seguridade e o benestar de todas as persoas que forman parte da súa contorna. Nesta liña, o club súmase ao despregamento do Protocolo-Guía Violeta impulsado por LALIGA, unha iniciativa destinada a reforzar a prevención e a actuación ante situacións de discriminación, violencia de xénero, violencia sexual e acoso nos estadios.
Esta adhesión dá continuidade a unha liña de traballo que o Celta xa iniciara hai anos. O club contaba cun protocolo propio de actuación ante este tipo de situacións e foi un dos pioneiros en España na implantación dun procedemento específico para ofrecer unha resposta axeitada e protexer as posibles vítimas.
A incorporación ao Protocolo-Guía Violeta non supón, polo tanto, o inicio deste compromiso, senón unha oportunidade para seguir desenvolvéndoo, compartir ferramentas e traballar de maneira coordinada con LALIGA e co resto dos clubs.
Prevención, formación e actuación coordinada
O Protocolo-Guía Violeta establece pautas comúns para identificar posibles situacións de risco, facilitar a comunicación e activar os mecanismos de actuación necesarios. O seu despregamento contempla, entre outras medidas, a formación dos profesionais implicados, a realización de simulacros prácticos e a incorporación de recursos que permitan identificar as persoas responsables da protección e facilitar a atención no estadio ABANCA Balaídos.
O Celta colaborará na implementación destas medidas, reforzando a preparación dos profesionais e a coordinación dos distintos axentes que interveñen ante unha posible situación de acoso ou violencia. O obxectivo é garantir unha resposta axeitada, eficaz e centrada na protección das persoas afectadas.
