O RC Celta reedita a súa historia cun nacemento longamente esperado. Igual que hai 100 anos, dous clubs únense para forxar un máis forte, que represente a Vigo e a Galicia con afouteza no fútbol español. RC Celta e Unión Deportiva Mos suman as súas forzas para lanzar un proxecto diferente e ilusionante, sostible e con identidade propia, que permitirá que o club celeste enriqueza a súa canteira, o seu crecemento e a súa proxección co fútbol feminino.
A sección de fútbol feminino da UD Mos será o embrión deste proxecto baseado na canteira, a competitividade e a ambición, que serve para completar ao RC Celta e impulsar de maneira notable a este deporte no sur de Galicia, coa Madroa, a fábrica de talentos do club, como o seu gran centro de operacións e a canteira como piar fundamental.
O equipo nacerá a próxima tempada en Terceira Federación, máis equipos infantil, cadete e filial, coa clara vocación de crecer sen pausa apoiándose na formación de xogadoras e na oportunidade que para as nenas de Vigo e a súa área supón dispoñer dos recursos adecuados para loitar polo seu soño: xogar ao fútbol.
O proxecto será presentado con todo detalle o próximo día nove do presente mes.
