O RC Celta e Siweb Planificación Integral Web pecharon un acordo de colaboración polo que a marca viguesa de márketing dixital, un dos maiores axentes digitalizadores do Kit Dixital , convértese en patrocinador oficial do club. O contrato estará vixente durante o resto desta tempada e a próxima, marcando unha alianza que reforza o compromiso da entidade celeste co talento e as empresas locais que comparten a súa filosofía e raíces. A partir de agora, o logotipo de Siweb estará presente na frontal do pantalón do primeiro equipo do RC Celta.
Fundada en 2006, Siweb presentouse ao mercado como unha alternativa innovadora ás páxinas web tradicionais, apostando pola automatización de procesos que permite axilizar a creación e o deseño web. Este enfoque revolucionario levou á marca a posicionarse como un referente no seu sector, recibindo recoñecementos como o premio ao Mellor Proxecto de Transformación Dixital nos Premios Capital 2024.
O RC Celta quere mostrar a súa satisfacción de poder pechar esta alianza cunha marca galega, coa cal comparte a súa filosofía de arraigamento polas raíces, e subliña a importancia de crear sinerxias con empresas locais líderes nos seus sectores.
