Borja Iglesias proclamouse campión do mundo coa selección española tras conquistar o Mundial 2026 na gran final disputada ante Arxentina no Estadio Nova York–Nova Jersey. Un título que permite a España lucir a súa segunda estrela, dezaseis anos despois do histórico triunfo en Sudáfrica 2010.
Deste xeito, o dianteiro celeste convértese no primeiro xogador do Celta en alcanzar a cima do fútbol mundial e no primeiro futbolista galego en proclamarse campión do mundo. Un fito histórico que enche de orgullo a toda a familia celeste e que leva o nome do Celta e de Galicia ao cumio máis alto do deporte.
Unha alegría compartida por un xogador que representa moito máis que fútbol. O Panda encarna uns valores cos que se identifica todo o celtismo pola súa proximidade, humildade, compromiso e afouteza. É un dos nosos. Un futbolista que nunca deixou de ser el mesmo e que demostrou que o éxito tamén se alcanza sendo fiel a quen es.
O nome de Borja Iglesias xa pertence para sempre á historia do fútbol español e mundial. Pero tamén, e sobre todo, á historia do Celta.
Parabéns, Borja. Parabéns, campión do mundo!
