O RC Celta celebra unha nova vitoria en casa ao impoñerse con claridade ao Villarreal grazas a tres goles con selo de canteira.
O partido comezou con moita intensidade, como era previsible, ante un rival da parte alta da táboa, o que prometía que sería un encontro de moita tensión. Comezaba dominando o “submarino amarelo” con tímidas chegadas celestes á portería rival, destacando o tiro directo de Marcos Alonso desde a banda que por un momento deixou sen respiración a toda a bancada. Pero, sen dúbida, sería a vermella directa a Bailly, no minuto 36, o que inclinaría a balanza a favor dos celestes. O central marfileño derrubou a Alfon cando practicamente encaraba só cara á portería, o que deixou ao Villarreal con 10 xogadores durante máis da metade do partido. Desde ese momento, os pupilos de Claudio Giráldez fixéronse donos do balón e da posesión, e pouco tardaron en atopar os espazos para concretar o seu dominio.
Ao fío do descanso, Fer López anotaba o que sería o seu primeiro gol en casa tras unha xogada que iniciaba Óscar Mingueza, centrando o balón para Alfon, quen decidía cambiar de orientación e cederllo ao canteirán vigués para que anotase a pracer desde a outra banda. Abría a lata o Celta que aínda puido irse aos vestiarios cunha vantaxe máis ampla grazas ás ocasións de Hugo Álvarez e Alfon que obrigaron a intervir ao gardameta rival, Júnior.
Na segunda metade, o Villarreal tentou reaccionar con diferentes cambios ofensivos, pero o conxunto de Claudio Giráldez mantivo o seu plan e non permitiu que os de Marcelino creasen demasiado perigo. No minuto 53, Borja Iglesias aproveitaba o rexeite dun potente tiro ao pau de Ilaix para facer o 2-0, coando o balón entre as pernas do porteiro e desatando a euforia no feudo celeste. Un tanto que parecía definitivo pero o final desta historia aínda non estaba escrito. Iago Aspas pecharía a conta, no minuto 87, anotando un penalti a favor do Celta, tras unha falta cometida sobre Ilaix Moriba dentro da área.
Desta maneira chegaba ao seu fin o encontro desta xornada intersemanal de Laliga EA Sport que non foi impedimento para que Abanca Balaídos colgase o cartel de entradas esgotadas e máis de 19.000 persoas gozasen dunha nova vitoria celeste coa que o equipo suma tres novos puntos para seguir soñando. A seguinte cita no calendario fará parada no estadio Santiago Bernabéu o vindeiro domingo, 4 de maio ás 14:00 horas, onde o RC Celta enfrontarase ao Real Madrid.
FICHA TÉCNICA:
3 – RC Celta: Vicente Guaita; Yoel Lago (Javi Rodríguez, min. 74), Carlos Domínguez, Marcos Alonso; Óscar Mingueza, Damián, Fran Beltrán (Ilaix Moriba, min. 46), Hugo Álvarez (Sergio Carreira, min. 54); Fer López (Iker Losada, min. 74), Alfon e Borja Iglesias (Iago Aspas, min. 66).
0 – Villarreal CF: Luiz Junior; Kiko Femenía (Pau Navarro, min. 74), Kambwala, Bailly, Pedraza; Yeremy Pino (Costa, min. 39), Gueye, Santi Comesaña (Parejo, min. 64), Denis Suárez (Buchanan, min. 64); Thierno Barry (Ayoze, min. 64) e Pepe.
Goles: 1-0, min. 44: Fer López. 2-0, min. 53: Borja Iglesias. 3-0, min. 87: Iago Aspas (p).
Árbitro: Alberola Rojas (Comité Castelán-Manchego). Expulsou ao xogador do Villarreal Bailly con vermella directa (min. 36). Amoestou a Fran Beltrán (min. 45) e a Hugo Álvarez (min. 47) por parte do RC Celta, e a Pepe (min. 84) por parte do Villarreal CF.
Incidencias: Partido correspondente á xornada 33 de LaLiga EA Sports disputado no estadio de Abanca Balaídos ante 19.324 espectadores. Nos prolegómenos do encontro gardouse un minuto de silencio en memoria do Papa Francisco.
