O RC Celta inunda de solidez, consistencia e calidade o seu centro do campo coa incorporación, cedido até final de tempada con opción de compra, do pivote internacional croata Filip Bradarić, pertencente ao Cagliari e procedente do Hajduk Split.
Bradarić (Split, Croacia, 11 de xaneiro de 1992) posúe unha dilatada experiencia na liga croata, onde o seu prestixio é inmenso, con importantes logros como a consecución do primeiro título de Liga da historia do HNK Rijeka. Tamén coñece a liga italiana tras o seu paso polo Cagliari, club ao que pertencen os seus dereitos e co que disputou unha trintena de encontros. É un futbolista con gran rigor táctico e intelixencia na ocupación de espazos e que ademais atesoura boa técnica, move o coiro con criterio e ofrece unha notable claridade na saída de balón.
Esta tempada disputou 9 partidos de liga e un de copa e entregou dúas asistencias. Bradarić é internacional absoluto con Croacia, selección coa que se proclamou subcampión do mundo en Rusia.
