O RC Celta xa coñece cal será o seu rival nos oitavos de final da Copa do Rey, o Real Madrid CF. Tras lograr o pase á seguinte rolda nun partido de infarto ante o Racing de Santander en El Sardinero, o conxunto de Claudio Giráldez medirase agora aos de Carlo Ancelotti nun novo encontro para seguir soñando.
Este mediodía, a Real Federación Española de Fútbol (RFEF) levou a cabo, na Cidade Deportiva de Las Rozas, o sorteo dos emparellamentos para a cuarta rolda da competición. A eliminatoria terá lugar os días 14, 15 e 16 xaneiro de 2025 e disputarase a partido único no estadio Santiago Bernabéu, nas próximas horas coñeceremos o horario definitivo do encontro.
Sen dúbida, un enfrontamento de altos voos entre o RC Celta e o Real Madrid CF que promete intensidade e moita adrenalina entre dous conxuntos que loitarán por avanzar a cuartos de final da Copa do Rey.
