O Celta caeu por 1-2 ante o CA Osasuna na estrea da tempada en Abanca Balaídos, nun encontro que os celestes tiveron de cara durante unha hora grazas a un gol temperán de Iago Aspas, e que se lles puxo costa arriba a partir da expulsión de Marcos Alonso.
Antes do encontro, o templo celeste rendeulle homenaxe a Borja Iglesias, primeiro futbolista do Celta e primeiro galego campión do mundo coa selección española. O dianteiro saltou ao céspede coa súa medalla, recibiu unha placa conmemorativa de mans de Sergio Álvarez e realizou o saque de honra. Tras este especial inicio, o conxunto de Claudio Giráldez saíu con personalidade e obrigou moi cedo a un Osasuna ben plantado a recuar. O premio chegou no minuto 14, cando Miguel Román habilitou a Iago Aspas para que o capitán superase a Sergio Herrera. Os celestes xestionaron o resto da primeira metade con madurez e chegaron ao descanso ante un rival que apenas inquietou a Andrei Radu.
Tras a reanudación, o partido cambiou de escenario. No minuto 51, o colexiado, tras a revisión do VAR, deixou o Celta cun xogador menos pola expulsión de Marcos Alonso. Osasuna deu un paso adiante, atopou o empate no 64 por medio de Kike Barja e, tras sinalarse un penalti na área celeste, Ante Budimir asinou o 1-2 no minuto 74. Lonxe de virse abaixo, os de Vigo buscaron o empate ata o final, sen atopar recompensa.
Agora, o foco trasládase de inmediato á seguinte cita, de novo en Abanca Balaídos. O próximo domingo 30 de agosto, ás 21:30 h, o Celta recibirá ao Athletic Club coa firme intención de estrear o seu casilleiro de vitorias.
FICHA TÉCNICA:
1 – Celta: Andrei Radu; Javi Rodríguez, Yoel Lago, Marcos Alonso; Javi Rueda (Hugo Álvarez, min. 65), Miguel Román, Ilaix Moriba, Javi Galán (Sergio Carreira, min. 65); Iago Aspas (Carl Starfelt, min. 52), Pablo Durán (Ferran Jutglà, min. 79) e Williot Swedberg (Jones El-Abdellaoui, min. 65).
2 – CA Osasuna: Sergio Herrera; Arguibide, Catena, Herrando (Rubén García, min. 58), Osambela, Bretones; Dubasin (Ante Budimir, min. 58), Moncayola (Iker Muñoz, min. 46), Torró, Kike Barja (Moi Gómez, min. 74) e Raúl García (Aimar Oroz, min. 82).
Goles: 1-0, min. 14: Iago Aspas; 1-1, min. 64: Kike Barja; 1-2, min. 74: Ante Budimir, de penalti.
Árbitro: Miguel Sesma Espinosa (Comité rioxano). Amoestou a Marcos Alonso (min. 51) por parte do Celta e a Jonathan Dubasin (min. 27) por parte do CA Osasuna. Marcos Alonso foi expulsado nesa mesma acción tras a revisión do VAR.
Incidencias: Encontro correspondente á xornada 1 aprazada de LaLiga EA Sports disputado en Abanca Balaídos ante 20.645 espectadores.
