O Celta Fortuna escribiu unha páxina máis na súa historia cunha estrea de categoría en LaLiga Hypermotion e sumando o seu primeiro punto na táboa. Por primeira vez, o filial celeste pisou o fútbol de prata e fíxoo nun escenario de moito nivel, o Novo Mirandilla, ante un Cádiz moi esixente. Unha estrea que terminou cun empate sen goles pero que sabe ao primeiro paso dun camiño ilusionante.
Ao Fortuna custoulle entrar no partido. O Cádiz apertou, dominou e levou o encontro ao seu terreo durante unha primeira metade na que os de Fredi Álvarez tiveron que ir crecendo co paso dos minutos. A pesar das arremetidas iniciais do conxunto gaditano, os celestes souberon resistir e crecer en defensa.
Tras o descanso chegou a transformación. O Celta Fortuna gañou presenza, atopou máis balón e empezou a xogar coa personalidade que os trouxo ata aquí. O debutante deixou atrás os nervios e converteuse nun rival incómodo, ata o punto de xerar as ocasións máis claras. Ángel Arcos tivo nas súas botas o 0-1, pero Ezkieta respondeu cunha gran intervención. Tamén Quique Ribes rozou o gol cun cabezazo a balón parado.
O Talento Feito na Madroa xa compite na categoría de prata, e de que xeito. Con toda unha travesía por diante, o conxunto de Fredi Álvarez xa se centra no seu próximo destino, o FC Andorra, ao que se enfrontará o vindeiro luns, 24 de agosto ás 19.00 horas, en Abanca Balaídos.
FICHA TÉCNICA:
0 – Cádiz CF: Ezkieta; Díaz, Noah (Kovacevic, min. 88), Castro, Rivera (Rosado, min. 62); Damián, Kouamé (Joaquín, min. 62), Ibon Sánchez (Vázquez, min. 62); De la Rosa (Suso, min. 70), Cordero; e Izeta.
0 – Celta Fortuna: Coke; Milla (Anxo, min. 46), Joel López (Jan Oliveras, min. 61), Pablo Meixús, Quique Ribes, Pablo Gavián; Hugo Burcio, Capde (Óscar Marcos, min. 77); Ángel Arcos, Álvaro Marín (Bernard Somuah, min. 61) e Kibet (Andrés Antañón, min. 46).
Árbitro: Arcediano Monescillo (Comité castelán-manchego). Por parte do Celta Fortuna, foron amoestados Joel López, Capdevila e Anxo Rodríguez. Mentres que do Cádiz CF viron tarxeta amarela Rivera, Kouamé, Ibon Sánchez e Damián.
Incidencias: Partido correspondente á primeira xornada de LaLiga Hypermotion disputado no Estadio Novo Mirandilla ante 14.548 espectadores. Nos prolegómenos do encontro gardouse un minuto de silencio polas vítimas do terremoto de Colombia.
