O Celta Fortuna iniciou a tempada cun empate sen goles ante o Zamora CF no Ruta da Prata. Un duelo igualado no que ningún dos dous equipos logrou romper o muro defensivo do rival, aínda que ambos tiveron ocasións para facelo. Un punto merecido para os vigueses na súa primeira saída do curso.
O encontro comezou cun lixeiro dominio dos locais, pero sen crear perigo real ante un filial celeste que se mostrou ben colocado sobre o terreo de xogo. A mellor ocasión da primeira metade foi para Joshua Farrell cun cabezazo que pasou preto do pau. O Fortuna tamén tratou de sorprender cun tímido disparo de Pablo Gavián e cun centro de Hugo González que non atopou rematador. Con empate a cero chegouse ao descanso.
O segundo tempo comezou co debut de Germain Milla, un cambio que deu máis ritmo ao partido e levou aos celestes a xerar unha nova ocasión cun disparo desviado de Álvaro Marín. O novo xogador celeste foi clave nos segundos 45 minutos, tanto nesta acción como nun gol que finalmente foi anulado por fóra de xogo. Outro dos destacados do filial foi Coke Carrillo, que resultou decisivo no tramo final cunha gran intervención ante Carlos Ramos que evitou o 1-0.
O Zamora seguiu intentándoo nos últimos compases, ao igual que o Fortuna a través de Ángel Arcos e Iago Barreiros, pero ningún dos dous conxuntos foi quen de inclinar a balanza ao seu favor. Agora os pupilos de Fredi Álvarez céntranse no seu próximo compromiso, o primeiro como locais nesta tempada, no que recibirán ao Guadalajara.
FICHA TÉCNICA:
0 – Zamora CF: Fermín, Luismi Luengo, Dani Merchán, Eric Ruiz, Mario, Márquez, Rufo, Carlos Ramos (Markel min 80), Loren (Sancho, min 72), Farrel (Clavería, min 80) e Monerris.
0 – Celta Fortuna: Coke; Anxo, Meixús, Joel López; Gavián, Burcio Capdevilla, min 77), Antañón, Luis Bilbao (Milla, min 46); Óscar Marcos (Somuah, min 77), Álvaro (Ángel Arcos, min 65) e Hugo González (Barreiros, min 94).
Árbitro: Aimar Velasco. Mostrou cartón amarelo aos xogadores do Celta Fortuna Luis Bilbao e Pablo Meixús.
Incidencias: Partido da Xornada 1 de Primeira Federación celebrado no Ruta da Prata de Zamora.
