O Celta B fixo historia o Día da Reconquista. Coa súa vitoria en O Vao (1-2) fronte ao combativo Coruxo, proclámase campión do seu grupo de Segunda B, o que lle garante competir a próxima tempada na Primeira División RFEF e aspirar nesta ao ascenso a Segunda División do fútbol profesional.
Os celestes remontaron ante o Coruxo no derbi vigués con goles de Markel Lozano e Iker Losada para certificar a primeira posición do seu grupo nunha tempada histórica, que continuará agora para o filial celeste coa liguilla de ascenso á categoría de prata do fútbol español.
O cadro de Onésimo repúxose con coraxe e fe ao tanto inicial do conxunto local e no tramo final da primeira metade selou a remontada nuns poucos minutos plenos de intensidade e ambición: Lozano e Losada permitiron ao Celta B chegar ao descanso cunha vantaxe que xa resultou definitiva.
A segunda parte comezou cun ritmo máis pausado, cun filial dominador e un Coruxo esperando á contra. O RC Celta B defendeuse con orde e conseguiu unha vitoria histórica en O Vao.
Ficha técnica
RC Celta B: Sequeira, Carreira, Brian, Cunha, Pampin, Markel, Jordan, Losada, Gabri Veiga, Manu Justo, Zoran. Tamén xogaron: Carlos Domínguez, Lautaro, Solís, Barri e Soni.
Goles: Markel, Losada
