O Celta repartiu os puntos co Girona tras volver empatar en Abanca Balaídos (1-1), nun partido intenso, con ritmo e moitas ocasións. Un penalti no tempo engadido sobre Javi Rueda permitiulle a Borja Iglesias rescatar un empate para os vigueses. O equipo de Claudio Giráldez mereceu máis, pero a falta de puntería e un Gazzaniga estelar baixo paus frustraron unha e outra vez os seus intentos.
O Girona adiantouse na primeira parte cun gol do debutante Vladyslav Vanat, que aproveitou o seu primeiro disparo para bater a Radu. O Celta reclamou falta previa sobre Jutglà, pero o árbitro deu validez ao tanto. A partir de aí, os celestes volcáronse no ataque. O ‘9’ celeste, moi activo, rozou o empate en varias ocasións, pero faltoulle acerto… e atopouse cun muro na portería rival.
Na segunda metade, o Celta apertou aínda máis. Borja Iglesias e Bryan Zaragoza deron aire fresco e as ocasións multiplicáronse. De novo, Gazzaniga salvou aos seus, pero no tempo engadido Blind cometeu penalti sobre Javi Rueda e Borja Iglesias transformou a pena máxima para selar o 1-1 definitivo.
É o cuarto empate a uns para o Celta nesta Liga, tras un partido que deixa boas sensacións, pero tamén a impresión de que escapou unha vitoria merecida. Agora os de Claudio Giráldez céntranse no seu próximo reto, que terá lugar o domingo 21 de setembro ás 14:00h en Vallecas.
FICHA TÉCNICA:
1 – Celta: Ionut Andrei Radu; Javi Rodríguez (Carl Starfelt, min.71), Carlos Domínguez, Manu Fernández (Javi Rueda, min.80); Sergio Carreira, Hugo Sotelo, Ilaix Moriba, Óscar Mingueza, Iago Aspas (Hugo Álvarez, min.70), Pablo Durán (Bryan Zaragoza, min.60), Ferran Jutglà (Borja Iglesias, min.59).
1 – Girona: Paulo Gazzaniga; Arnau Martínez (Alejandro Francés, min.67), Vitor Reis, Daley Blind, Álex Moreno; Axel Witsel, Iván Martín (Jhon Solís, min.82), Azzedine Ounahi (Donny van de Beek, min.82); Yaser Asprilla, Vladyslav Vanat (Bryan Gil, min.67), Joel Roca (Cristian Portu, min.46).
Goles:
0-1, min.12: Vladyslav Vanat
1-1, min.90(+3): Borja Iglesias, de penalti
Árbitro: Adrián Cordero. Amonestou a Azzedine Ounahi (min.26), Alejandro Francés (min.80), Cristian Portu (min.90+1) e Míchel (min.90+1). Ademais, sinalou penalti sobre Javi Rueda tras revisar o VAR (min.90+1).
Incidencias: Partido correspondente á Xornada 4 de LALIGA EA SPORTS 25/26 disputado en Abanca Balaídos ante 18.862 espectadores.
