O Celta vestirá no seu primeiro partido da fase de grupos da UEFA Europa League ante o VfB Stuttgart, no MhP Arena, a camiseta especial Oliveira dos Cen Anos. Este equipamento xa forma parte do corazón do celtismo e volve aos terreos de xogo tras aparecer fronte Las Palmas en Abanca Balaídos o pasado 31 de marzo, para honrar a popular festa da Reconquista.
Inspirada no himno “Oliveira dos Cen Anos“, esta elástica recolle todos os elementos ligados á alma e á identidade do conxunto celeste, unha homenaxe ás nosas raíces e unha declaración de identidade, de pertenza e de compromiso coa nosa historia.
Todos os celtistas que xa dispoñan dunha camiseta auténtica desta edición poderán acudir ás tendas oficiais do Celta, en A Sede e Abanca Balaídos, para engadir na manga o parche oficial da UEFA Europa League por 10 euros. Insistimos que este servizo só estará dispoñible para camisetas auténticas da Oliveira e non se poderá aplicar nas camisetas de Laliga 2025/26. Para aqueles que esperades ansiosamente a posibilidade de atesourar o recordo deste tempada histórica, nas próximas semanas teredes máis novidades referentes aos parches da Europa League.
E se aínda non tes a túa Oliveira podes facerte coa túa a traves de rio1923.gal ou nas tendas oficiais do Celta.
O partido ante o Stuttggart marcará o comezo dunha nova e ilusionante aventura continental. E facémolo como mellor sabemos, defendendo orgullosos nosas raíces, a nosa historia, o legado dunha cidade que nunca se rende.
Xuntos imos a por Europa, afección!
