Williot Swedberg recibiu de mans de Vlado Gudelj o premio a Mellor Xogador sub-23 de Laliga EA Sports do mes de decembro en Abanca Balaídos, nos prolegómenos da vitoria do Celta ante o Rayo Vallecano.
Arroupado pola ovación de toda a afección celeste, o atacante sueco recibía o seu primeiro galardón da tempada en recoñecemento ao gran estado de forma que demostrou ao longo do pasado mes e que levou ao conxunto celeste a sumar 7 dos 9 puntos posibles, confirmando a boa dinámica do equipo.
Williot Swedberg foi o gran protagonista da histórica vitoria do Celta no Santiago Bernabéu tras anotar os dous goles do partido. O seu excelente estado de forma tivo continuidade na seguinte xornada fronte ao Athletic Club, encontro no que volveu marcar e resultou decisivo para alcanzar a que sería a primeira vitoria da tempada na competición doméstica en Abanca Balaídos.
O premio, outorgado por Laliga xunto a Riyadh Season, destaca a súa influencia no xogo ofensivo, a súa capacidade de desequilibrio e o seu crecemento constante a pesar da súa mocidade. Na votación final, Swedberg impúxose a Marc Pubill (Atlético de Madrid), Jude Bellingham (Real Madrid), Jan Virgili (RCD Mallorca) e Héctor Fort (Elxe CF).
