O Celta e Javi Rodríguez chegaron a un acordo para ampliar a súa vinculación ata xuño de 2030. O defensa renova así o seu compromiso co club que o viu medrar e no que se consolidou como unha peza importante para Claudio Giráldez.
Natural de Poio, Javi chegou á Madroa con tan só sete anos, na categoría Benxamín B. Desde entón superou cada unha das etapas de A Canteira ata alcanzar o primeiro equipo, co que debutou o 1 de novembro de 2023 na Copa del Rey ante o Turégano CF.
A pasada campaña disputou 33 partidos de LaLiga EA Sports, 28 deles como titular, e viviu a súa primeira experiencia continental cunha ducia de encontros na UEFA Europa League. O seu bo facer levouno a recibir o pasado verán a chamada da Absoluta, coa que cumpriu o soño de debutar ante Iraq, antes de que o combinado nacional cruzase o charco para bordar a súa segunda estrela.
E ese nivel mantense neste inicio de curso, no que xa suma catro partidos na competición doméstica e outro en Chipre, que lle permitiron superar os 90 encontros oficiais co primeiro equipo celeste.
Con esta renovación, o Celta reafirma a súa aposta polo talento Feito na Madroa e asegura a continuidade dun futbolista con saída de balón, lectura do xogo e valentía, que representa como poucos os valores de A Canteira.
Parabéns, Javi!
