O RC Celta traballa a contrarreloxo para poñer a nova bancada ao dispor dos seus abonados para a final o vindeiro domingo ante o FC Barcelona (Abanca Balaídos, 21:00 horas). O club pretende, e niso pon todo o seu empeño, axilizar ao máximo as xestións necesarias para posibilitar a apertura da bancada e multiplicar o apoio ao equipo nun encontro transcendental.
Que se poida utilizar a nova bancada depende de diversas cuestións, dúas delas imprescindibles. Por unha banda, a aprobación do uso da bancada por parte de LaLiga e operadores, que tras o firme requirimento do club, deberán terminar as probas e instalacións necesarias, o vindeiro mércores, día 31 de maio, e validar a súa utilización. Por outro, a entrega da autorización pertinente por parte do Concello de Vigo.
En caso de arranxar ambas cuestións, que todos desexamos que sexa urxentemente, o novo fondo abrirá as súas portas para o vital encontro ante o FC Barcelona, aínda que con diversos condicionantes. Non haberá servizo de cantinas, nin ascensores, nin luz artificial, nin megafonía nin marcador electrónico. O club proverá dun servizo de refrixerio aos afeccionados que acudan a esa parte do estadio.
As entradas de todas as bancadas dispoñibles para a partida fronte ao FC Barcelona poñeranse á venda o mércores ás 16:00 horas, incluídas as da nova bancada se a súa apertura é posible. A venda será en liña a través da páxina web oficial do club, aínda que os despachos de billetes do estadio tamén abrirán ás 16:00 horas para venda presencial ata esgotarse. Recoméndase o servizo en liña por unha maior axilidade.
As entradas de todo o estadio, incluídas as da nova bancada no caso de que estea dispoñible, venderanse durante tres días (mércores tarde, xoves e venres) exclusivamente aos abonados celestes ao prezo de 5 euros cada unha. Cada abonado poderá adquirir un máximo de dous billetes ata a tarde do día 2 de xuño. Se despois dese día aínda quedan entradas dispoñibles, procederase á súa venda ao público en xeral a un prezo xa superior.
