LaLiga e os operadores asignados completaron esta mañá as probas e instalacións necesarias para a apertura da nova bancada de Abanca Balaídos. Pola súa banda, o Concello de Vigo facilitoulle ao RC Celta nas últimas horas un permiso temporal para o seu uso dende a tarde do venres ata as 8:00 horas do próximo luns, polo que, tal como anunciabamos, dende esta tarde ás 16:00 horas os abonados celestes poderán adquirir dúas entradas ao prezo de 5 euros cada unha para o vital partido do domingo ante o FC Barcelona.
As localidades de todo o estadio, incluídas as da nova bancada, venderanse, tanto en liña en abonados.rccelta.es como nos despachos de billetes do estadio, durante tres días (mércores tarde, xoves e venres) exclusivamente aos abonados celestes ao prezo de 5 euros cada unha.
Cada abonado poderá adquirir un máximo de dous billetes ata a tarde do día 2 de xuño. Se despois dese día aínda quedan entradas dispoñibles, procederase á súa venda ao público en xeral a un prezo xa superior. Os asentos para a nova bancada, que non contará con marcador electrónico, megafonía ou luz artificial, entre outros servizos, serán asignados de maneira automática. O club recomenda en todos os casos que os abonados realicen a compra das entradas en liña para evitar esperas nos despachos de billetes.
Novas club
