20260422_Estadio_BARCELONAvsCELTA-6
Celtismo

Xa dispoñibles as entradas para apoiar o Celta no Camp Nou

RC Celta

Chega o momento de facer as maletas para vivir unha das citas máis esperadas da tempada. Xa está aberta a pre-reserva de entradas para a Xornada 15, na que o Celta viaxará ao Camp Nou para medirse ao FC Barcelona. O encontro disputarase o próximo 5 de decembro, ás 21:00h., e as localidades terán un prezo único de 30 €.

A continuación, explicamos detalladamente como realizar o proceso e cales son os pasos que se deben seguir desde o Portal do Celtista:

  1. Pre-reserva e asignación

Para optar a unha entrada é necesario realizar unha inscrición no Portal do Celtista e efectuar un pagamento de pre-reserva (5 euros), co obxectivo de que as solicitudes sexan en firme. Este importe será devolto no caso de non resultar seleccionado/a.

Este pagamento non garante automaticamente a entrada, senón que permite participar no proceso de asignación, que se rexerá polos seguintes criterios:

  • 75 % das entradas asignaranse segundo a antigüidade: terase en conta a media de antigüidade no caso dos grupos e a antigüidade individual nas solicitudes persoais.

  • 25 % das entradas asignaranse mediante un sorteo entre os solicitantes restantes.

Unha vez finalizado o proceso de asignación, todos os inscritos recibirán un correo electrónico informando do resultado da súa solicitude.

  1. Pagamento final para as persoas seleccionadas

Os celtistas que resulten seleccionados recibirán un correo de confirmación o luns 23 de novembro coas instrucións para completar a compra, abonando a diferenza respecto da pre-reserva realizada.

Para formalizar a compra, deberán seguir estes pasos:

  1. Acceder ao Portal do Celtista e dirixirse ao apartado «Entradas Visitante».

  2. Completar o pagamento nun prazo máximo de 24 horas desde a recepción do correo.

  3. Recibirán a confirmación da compra e a información sobre a entrega da entrada.

⚠ Importante: Se o pagamento non se realiza dentro do prazo indicado, perderase o dereito a adquirir a entrada e o importe da pre-reserva non será reembolsado.

  1. Devolución para as persoas non seleccionadas

Aqueles afeccionados que non resulten seleccionados recibirán un correo coa notificación e, de forma automática, o club procederá ao reembolso íntegro do importe da pre-reserva no mesmo método de pagamento utilizado durante a inscrición.

  1. Confirmación e entrega das entradas

Os seguidores que completen o proceso de compra recibirán un correo electrónico de confirmación. É importante lembrar que o xustificante de pagamento non é válido como entrada.

Neste caso, as entradas serán dixitais. En caso de producirse calquera cambio, o club poñerase en contacto a través do correo electrónico.

Unha vez realizada a compra, non se permiten cambios nin devolucións.

A preinscrición para as entradas está dispoñible no Portal do Celtista desde hoxe mesmo ata o luns 23 de novembro ás 12:00h. Lembramos que estas son nominativas e será necesario presentar o DNI xunto coa entrada no acceso ao estadio.

Vémonos no Camp Nou, celtistas!

RC Celta

Etiquetas

Celtismo

Noticias recomendadas