A cidade de Vigo volveu tinguirse de celeste nunha xornada inesquecible con motivo da novena edición da Invasión Celeste by Profand, a carreira popular e solidaria organizada pola Fundación Celta. Case 3.000 participantes de todas as idades sumáronse a esta gran festa do celtismo, que se celebrou nun ambiente inmellorable baixo un sol radiante.
A edición deste ano chegou con importantes novidades, como a incorporación dunha andaina e dunha categoría inclusiva, apadriñada polo Celta Integra Zelnova e protagonizada polos integrantes de DisCamino, reforzando así o carácter aberto, participativo e solidario do evento.
O pistoletazo de saída tivo lugar ás 10 da mañá coas probas de 5 e 10 quilómetros, seguidas posteriormente polas carreiras que se celebraron integramente en ABANCA Balaídos: as probas de 1 quilómetro e Chiquiceltas. O percorrido levou aos participantes por algunhas das principais rúas de Vigo, nun itinerario que converteu o corazón da cidade nun auténtico escenario celeste. A proba de maior distancia incluíu ademais un treito pola senda do Lagares, ampliando a experiencia deportiva nun entorno natural.
A saída, situada na Rúa do Príncipe á altura de A Sede, estivo marcada por un ambiente espectacular. Milleiros de afeccionados, na súa maioría vestidos coa camiseta celeste da propia carreira, entoaron o himno “Oliveira dos cen anos” e protagonizaron unha emotiva onda colectiva. Tampouco quixo perderse a cita Chiño, a nosa mascota, que acompañou aos participantes durante toda a xornada, tanto na saída en Príncipe como en ABANCA Balaídos cando lles tocou correr aos máis pequenos.
Ademais do compoñente deportivo, a Invasión Celeste by Profand volveu destacar pola súa vertente solidaria. Os participantes tiveron a oportunidade de realizar doazóns voluntarias durante a inscrición, que foron duplicadas polo Grupo Profand, principal patrocinador do evento. A recadación total destinarase integramente á Asociación CTNNB1 España, contribuíndo así á investigación e apoio a nenos afectados por este grave trastorno do neurodesenvolvemento.
Unha vez máis, o celtismo demostrou o seu compromiso, a súa unión e a súa capacidade para converter o deporte nunha ferramenta de solidariedade e orgullo de cidade.
