Fai apenas catro días, Óscar Marcos, Ángel Arcos, Hugo Burcio e Pablo Gavián deixaron o Xuvenil para unirse ao plantel do Celta Fortuna, rebosante de xogadores da canteira. Hoxe, Damián, Hugo Álvarez, Pablo Durán e Carlos Domínguez intégranse no plantel de Primeira División que dirixe Claudio Giráldez.
A aposta do RC Celta por potenciar a súa canteira, por maximizar os procesos de formación, toma corpo e queda patente coa promoción destes oito xogadores.
O plantel celeste contará desta maneira coas calidades e o talento destes catro novos futbolistas galegos, de Ponteareas, Ourense, Vigo e Tomiño, que co seu esforzo e calidade percorreron o mesmo camiño que con anterioridade emprenderon Iván Villar, Kevin e Iago Aspas.
A etapa dos catro futbolistas na canteira celeste chega por tanto ao seu fin nesta pretemporada que o equipo celeste iniciou hai pouco máis dunha semana coa mirada posta no debut ligueiro en Abanca Balaídos ante o Deportivo Alavés.
