Javi Rodríguez compareceu ante os medios de comunicación xunto ao director de Fútbol, Marco Garcés, tras facerse oficial a súa renovación co Celta ata 2030 prolongando unha historia que comezou cando apenas tiña oito anos.
Aquel neno que chegou á Madroa para facer unhas probas, acompañado de Pablo Meixús e cos nervios propios de quen empeza a perseguir un soño, é hoxe un xogador do primeiro equipo que acaba de ampliar o seu compromiso co club da súa vida.
“Estou a vivir un soño. Penso que aquel neno de oito anos estaría super orgulloso de ver todo o que conseguiu”, recoñeceu Javi, que quixo agradecer á presidenta e ao corpo técnico a confianza depositada nel durante estes anos.
“Estou moi contento de estar aquí, de estar onde quero estar e de todo o que estamos a conseguir neste club”, sinalou o defensa, que afronta esta nova etapa coa ilusión de seguir crecendo en casa.
