O RC Celta caeu por 3-1 ante o Espanyol na súa visita ao RCD Stadium. Aínda que un gol de penalti de Iago Aspas no tramo final deu esperanzas aos celestes, os de Manolo González mostráronse máis efectivos e contundentes nas áreas.
O Espanyol arrincou o partido con gran intensidade, impoñendo o seu ritmo e achegándose perigosamente ás inmediacións de Vicente Guaita. Unha presión que obtivo a súa recompensa xusto antes do descanso, cando Cardona protagonizou unha espectacular xogada á contra tras un balón parado a favor do Celta. O perico conduciu con velocidade desde o seu propio campo, aproveitando unha defensa desaxustada, para marcar un golazo imparable minutos antes da saída a vestiarios.
Na segunda metade, os locais mantiveron a súa inercia positiva e pouco tardaron en ampliar a súa vantaxe. Un saque de esquina que terminou cun remate de Leandro Cabrera, tras un rexeite dentro da área, subiu o 2-0 ao marcador. Pese ao mazazo, o Celta seguía xerando ocasións que, aínda que non demasiado claras, inquietaron á defensa do cadro perico.
Este esforzo dos de Giráldez tivo o seu premio no minuto 83, cando Iago Aspas non perdoou desde os once metros. Un penalti sobre Óscar Mingueza, que terminaría convertendo o capitán celeste, axudou a recortar distancias e dar unha pincelada de esperanza durante o tramo final do encontro. Con todo, o ímpeto celeste duraría pouco, xa que só catro minutos despois, Cheddira aproveitaría as debilidades da zaga galega para sentenciar o partido.
Agora, os de Claudio Giráldez céntranse na Copa del Rey, onde se enfrontarán ao Salamanca CF UDS o vindeiro martes ás 21:00h. Mentres que, en competición ligueira, volverán á acción o venres á mesma hora contra o RCD Mallorca en Abanca Balaídos.
FICHA TÉCNICA:
3- RCD Espanyol: Joan García, Brian Oliván, Leandro Cabrera, Kumbulla, Omar El Hilali, Justin Smith, Alex Král, Pol Lozano, Jofre Carreras, Javi Puado, Irvin Cardona. Tamén xogaron Bauza, Cheddira, Romero e Tejero.
1- RC Celta: Vicente Guaita, Hugo Álvarez, Marcos Alonso, Carl Starfelt, Javi Rodríguez, Óscar Mingueza, Ilaix Moriba, Damián, Jonathan Bamba, Douvikas, Iago Aspas. Tamén xogaron Borja Iglesias, Williot, Manquillo e Alfon.
Goles: 1-0 (39’) Cardona; 2-0 (53’) Cabrera; 2-1 (83’) Iago Aspas; 3-1 (87’) Cheddira.
Árbitro: Sánchez Martínez (comité murciano). Amonestou aos locais Kumbulla (55’) e Joan García (86’); e aos visitantes Marcos Alonso (35’) e Hugo Álvarez (45’).
incidencias: Partido correspondente á xornada 15 de LALIGA EA SPORTS disputado no RCD Stadium.
