Barreiro viviu unha auténtica choiva de goles nunha xornada de intenso sol e altas temperaturas. Espectacular actuación do Celta B nunha das mellores primeiras partes do filial celeste nesta tempada, aínda que o segundo tempo, sobre todo no tramo final, tivo unha cor diferente.
E é que os de Onésimo chegaron ao descanso cun contundente 4-0 no marcador. O conxunto vigués dominou o encontro desde o asubío inicial ante unha Cultural atenazada e incapaz de conter a un impetuoso Celta B.
Javi Castro abriu o marcador nada máis arrincar o choque, no minuto 6, un gol ao que seguiu o de Jordan Holsgrove case de inmediato. Aínda por riba, Fabri non quixo perderse a festa goleadora e uniuse cun dobrete antes do tempo morto.
A segunda parte arrincou cun morno equilibrio no xogo que a Cultural aproveitou para acurtar distancias no minuto 55, un tanto obra do ruso Obolskii. Apenas tres minutos máis tarde, Miguel Rodríguez puña o quinto dos celestes no electrónico de Barreiro.
Cando a vitoria parecía garantida e a reacción leonesa un espellismo, os visitantes metéronse no partido. Primeiro o exceleste Solís, desde o punto de penalti, e despois Angong, colocaban un 5-3 que provocaba nervios na bancada.
A posibilidade dunha remontada deu ás ao conxunto leonés, que creu até o final no empate. A cinco minutos de completarse o tempo regulamentario, un lanzamento de falta directa impactou no poste da portaría defendida por Gaizka.
O son do asubío final foi auténtico pracer para os oídos de todo Barreiro. Importante vitoria do Celta B que fai case tanxible a clasificación ao playoff de ascenso.
FICHA TÉCNICA
5 – CELTA B: Gaizka, Álex Martín, Javi Castro, Pampín, Alfon (Javi Gómez, min.65), Holsgrove, Iker Losada (Cedric, min.80), Carlos Domínguez (Carrique, min.72), Carbonell, Fabri (Lauti, min.65), Miguel Rodríguez (Beitia, min.80).
3 – CULTURAL: Sotres (Edu Frías, min.38), Mangana, Escobar, Aarón (Vitoria, min.46), Castañeda, Rodri, Solís, Obolskii, Fran Cruz (Gaztañaga, min.46), Sierra (David López, min.46), Angong (Jony Álamo, min.77).
Goles: Javi Castro (1-0, min.6), Holsgrove (2-0, min.9), Fabri (3-0, min.17), Fabri (4-0, min.43), Obolskii (4-1, min.55), Miguel (5-1, min.58), Solís (5-2, min.71), Angong (5-3, min.75).
Árbitro: Amonestó a Cedric (Celta B); Sierra, Gaztañaga e Rodri Suárez (Cultural).
Campo: Barreiro.
