O Celta Fortuna impúxose por 3-1 ao Coruxo CF no penúltimo amigable da pretempada. Nunha mañá calorosa na Cidade Deportiva Afouteza, os goles de Bernard Somuah, David Sueiro e Jorge Pérez-Lafuente deron ao filial celeste unha vitoria con boas sensacións ás portas da súa estrea en Segunda División.
A primeira metade foi de dominio celeste, co Fortuna levando o peso do xogo e boa parte do tempo en campo rival. Porén, foi o Coruxo quen aproveitou unha das súas primeiras chegadas para adiantarse no marcador. Unha vantaxe que durou pouco, xa que apenas tres minutos despois, Bernard Somuah apareceu para rematar un córner servido por Hugo López e devolver as táboas ao marcador. A partir de aí, os celestes seguiron insistindo cunha ocasión do propio Somuah e un disparo afastado de Jan Oliveras que se marchou por riba do traveseiro, pero chegouse ao descanso sen cambios no marcador.
Tras o paso polos vestiarios, o Fortuna volveu pisar o acelerador e atopou axiña o premio a través de Sueiro, que apareceu na área para cabecear ao fondo da rede e poñer o 2-1. O tanto daba vantaxe aos celestes, pero non tranquilidade. O Fortuna quería máis e seguiu buscando un terceiro que pechase o encontro. Este chegou ao fío do final, tras unha gran arrancada en solitario de Pérez-Lafuente que culminou co 3-1 definitivo.
Con esta vitoria, os de Fredi Álvarez poñen agora a mira no seu último compromiso da preparación, que será esta mesma tarde ante o UD Ourense no Municipal de Barreiro. Un último test a porta aberta para despedir a pretempada xunto ao celtismo e dar o pistoletazo de saída a un curso histórico en LaLiga Hypermotion.
