A vicepresidenta da Deputación de Pontevedra, Luisa Sánchez, visitou este luns, nas instalacións deportivas de A Madroa, ao corpo técnico e ás xogadoras do primeiro equipo de As Celtas para presentarlles o novo plan de axudas destinado a mulleres da provincia que desexen completar a súa formación como adestradoras, técnicas, xuízas ou árbitras.
Este programa ten como obxectivo fomentar a presenza e o liderado feminino en todos os ámbitos do deporte, ofrecendo apoio económico e formativo a aquelas mozas que queiran dar o paso cara á dirección técnica ou a arbitraxe.
Luisa Sánchez estivo acompañada polo conselleiro do Celta, Sergio Álvarez; e a xefa de Deportes provincial, Xisela Aranda; nun encontro onde compartiron con As Celtas os detalles deste plan que busca impulsar o desenvolvemento e a igualdade de oportunidades no deporte pontevedrés. A visita serviu tamén para destacar o papel referente de As Celtas na promoción do fútbol feminino.
