As Celtas enfrontaranse ao RCD Espanyol Femení o vindeiro mércores 4 de novembro en A Madroa, na terceira rolda da Copa de la Reina. A eliminatoria, a partido único, volverá levar a competición ao feudo celeste, escenario dos dous primeiros encontros coperos das de David Ferreiro.
As Celtas iniciaron o seu camiño na competición cunha vitoria ante o Real Avilés Industrial e o pasado mércores deron un novo paso adiante fronte ao Real Oviedo Femenino (3-1). Agora, xa coñecen o seu próximo rival. Este mediodía, a Real Federación Española de Fútbol (RFEF) celebrou na Cidade do Fútbol das Rozas o sorteo dos emparellamentos, e o azar quixo que o Espanyol visite Vigo.
Será un partido especial para un conxunto olívico que continúa facendo historia na súa primeira participación na Copa de la Reina, competición na que as celestes buscarán seguir avanzando.
