Acabou na novena posición tras caer ante o Valencia (2-1). Íñigo López anotou o gol celeste
Non chegou a quinta vitoria consecutiva en Mestalla, pero si un espléndido noveno posto para pór fin a unha gran tempada. O Celta caeu ante a Valencia por dous goles a un. Íñigo López foi o autor do tanto celeste, que chegou nos primeiros compases do partido.
O Celta non arrincou relaxado ou durmido en Mestalla nin moito menos. Aos 5 minutos pase espléndido de Nolito a Jonny por detrás da zaga e centro medido do lateral para que un central, Íñigo López, anotase o primeiro tanto do choque cun remate certeiro na área pequena. O defensor estreouse como goleador cos vigueses.
A Valencia, enrabietado ante a súa afección, buscou o empate pouco despois cun remate de Vargas tras un centro desde a dereita que saíu lixeiramente desviado. O partido gañara en ritmo e intensidade, en vistosidade a pesar de que as ocasións non abundaban.
O Celta mantiña o seu estilo, e o seu empuxe, e fabricaba fantásticas xogadas, como unha, pasado o primeiro cuarto de hora, ao primeiro toque e a gran velocidade que acabou con Carreiros derrubando a Álex López na área fronte a Alves. Non houbo penalización.
Sergio, aos 20 minutos, voou para desviar de maneira prodixiosa un remate desde a frontal de Míchel. Os mesmos protagonistas pasada a media hora de xogo. Sergio volveu desviar o remate, esta vez máis afastado, do centrocampista local.
Alves tamén estivo acertado, aos 39 minutos, a un potente remate de Álex López. Un minuto despois, Feghouli, cabeceou á rede na área pequena unha deixada tamén de cabeza de Piatti. O empate xa non se moveu até o descanso.
Tras a continuación, longos minutos de tenteo, sen chegadas claras. Até os 10 minutos. A fortuna aliouse coa Valencia, Piatti cabeceou, o coiro rebotó nun defensor e despistou a Sergio. A Valencia adiantouse, con sorte, nun momento no que nada pasaba no choque.
Alves detivo aos 14 minutos un bo lanzamento de falta, afastada, de Nolito. Tamén atrapou con seguridade, aos 20, un remate de Madinda tras un bo pase de Jonny.
Moita posesión celeste até o final, pero con poucas ocasións máis. O Celta pechou en Valencia unha brillante tempada na que concluíu nunha máis que meritoria novena posición na táboa.
FICHA TÉCNICA
2-Valencia: Alves, Joao, Senderos, Mathieu, Bernat, Parejo, Míchel, Feghouli (Araujo, min.89), Jonas (Barragán, min.83), Piatti e Vargas (Alcácer, min.66)
1-R.C.Celta: Sergio; Jonny, Iñigo López (Costas, min.75), Fontàs, Aurtenetxe, Alex López (Krohn-Dehli, min. 56), Oubiña, Madinda Orellana, Nolito e Santi Mina (Mario Bermejo, min.59)
Goles: 0-1, min.5: Íñigo López; 1-1, min.40: Feghouli; 2-1, min.55: Piatti
Árbitro: Del Cerro Grande, do comité madrileño. Amonestou a Joao, Aurtenetxe, Álex López, Nolito
Campo: Mestalla
